रेशनकार्डधारकांनो द्या लक्ष : काळाबाजार रोखण्यासाठी उपाययोजना
गोंदिया, ब्युरो. स्वस्त धान्य दुकानातून देण्यात येणारे धान्य पूर्वी त्या महिन्यात घेतले नसल्यास पुढील महिन्याच्या सात दिवसांत घेण्याची मुभा होती. मात्र आता ही मुभा बंद करण्यात आली आहे. त्याच महिन्यात धान्य घेण्याची सक्ती करण्याचा निर्णय शासनाच्या अन्न नागरी पुरवठा विभागाने घेतला आहे.
रेशनकार्डधारकांना आता दरमहा देण्यात येणारे धान्य त्याच महिन्यात घ्यावे लागणार आहे. दरमहा शिल्लक राहणारे धान्य आणि रेशन धान्यातील काळाबाजार रोखण्यासाठी शासनाने हे पाऊल उचलले आहे. दरमहा रेशनदुकानांवरून धान्य घेतले नाही, तर पुढच्या महिन्यात पाठीमागील महिन्याचे धान्य मिळणार नाही. या निर्णयाचे परिपत्रक शासनाने
जारी केले आहे. चालू महिन्यांत धान्य घेतले नाही तर पुढील महिन्याच्या 1 तारखेपासून 7 तारखेपर्यंत असलेली
मुभादेखील यापुढे नसणार आहे. त्यामुळे नागरिकांना दरमहा नियमित वेळेत धान्य घ्यावे लागणार आहे.
