चंद्रपूर : रंगपंचमीच्या दिवशी दारूच्या नशेत महिलेला मोबाईलवर अश्लील शिवीगाळ करणे मुख्याध्यापक ज्ञानेश्वर खाडे याला चांगलेच महागात पडले. त्या महिलेने खाडे याला भररस्त्यात पकडून चप्पल आणि काठीचा प्रसाद दिला. चंद्रपूर जिल्ह्यातील ताडाळा येथील हा प्रकार आहे. मुख्याध्यापक ज्ञानेश्वर खाडे हे 2018 पासून जिल्हा परिषद उच्च प्राथमिक शाळा, ताडाळा येथे कार्यरत आहेत. तसा त्यांचा कार्यकाळ वादग्रस्तच राहिलाय. त्यांच्या अनेक तक्रारी शिक्षण विभागाकडे गेल्या आहेत. धुलीवंदनाच्या दिवशी सायंकाळी ताडाळा येथे जाऊन या महाशयाने एका महिलेला भ्रमणध्वनीवर अश्लील शब्दात शिवीगाळ केली. यामुळे संतापलेल्या महिलेने त्याला रस्त्यात गाठून चप्पल आणि काठीने बदडून काढले. या प्रकारचा व्हीडीओ आता व्हायरल झाला आहे. या मुख्याध्यापकाला तातडीने सेवेतून बडतर्फ करावे, अशी मागणी गावकरी करीत आहेत.
